Real Madrid legend Sergio Ramos chuan tunkar tawpa El Clasico khelh turah Real Madrid player Kylian Mbappe chu che tha viau turin a duh a, Barcelona hneh ngei turin a duh pui a ni. Spanish club lian pahnih te hi 2025-26 season bikah a vawikhatna atan tunkar tawp khian El Clasico an khel dawn a ni.
Los Blancos captain hlui Sergio Ramos chuan a unaupa Kylian Mbappe chu Barcelona an hmachhawn hunah tha taka che turin a duh pui a, Barcelona hneh ngei se tih chu a duh thu El Chiringuito TV a hrilh.
"I lo hriat tawh angin, kei chu ka thih thlengin Real Madrid lamah ka tang dawn a, Madrid lam hi hnehna an chan ngei ka beisei, ka unaupa Kyky pawh tha taka che turin ka duh pui a ni."
Kan hriat angin, Sergio Ramos leh Mbappe hi French club lian Paris Saint-Germain (PSG) tan an lo khel dun tawh a, mahse, tunah erawh team hrang ve ve tan an khel tawh a ni. Kum 2021 khan Sergio Ramos chuan Real Madrid lama a contract neih a hman zawh hnuin, Paris Saint-Germain a zawm a ni. Summer transfer hmasa zawkah khan Kylian Mbappe pawhin Real Madrid a zawm ve bawk a ni.
Kylian Mbappe hian Real Madrid lama season khat a awm naah, El Clasico record a nei tha vak lo, vawi 4 in hmachhawn tawhin Barcelona lakah vawi 4 lai an tlawm a ni, game 4 atangin goal 5 khung tho mahse, point erawh an hlawh chhuak lo a ni.
Tunkar tawpa an inhmachhawn hunah erawh hnehna chang ngei turin Sergio Ramos chuan a duhsakna sang ber a hlan.
0 Comments