Peter Schmeichel'an Ruben Amorim chuan captain thlak se tih a duh!

 Manchester United captain hlui Peter Schmeichel chuan Ruben Amorim hian Man Utd captain atangin Bruno Fernandes chu thlak se tih a duh a. A chhan pakhat chu field chhunga Purtuguese midfield body language chungchangah duhkhawplohna a neih vang a ni. Kan hriat angin kartawp inkhelah Liverpool chuan Manchester United chu Anfield-ah an lo mikhual a, Red Devils lam hian Anfield-ah 2-1 in hnehna an chang a, kum 10 dawn tep hnuah a vawikhatna atan Anfield-ah hnehna an chang a ni.

Kum 2024 November thla khan Man Utd lam chuan Ruben Amorim chu an coach atan an la lut a, Amorim'an United a enkawl hnuah duh ang leh beisei angin a chet that pui lova, mahse,a vawikhatna atan Premiere League bikah a zawnin match 2-ah hnehna a chan pui ve ta a ni.

Kan hriat angin Man Utd lam hi an beisei ang leh duh angin an che lo tih chu kan hre vek awm e, mahse, tun hnai lawk atang khan an rawn che tha ve viau. October international break neih hma khan United chuan Sunderland chu an lo hneh tawh a, an game hnuhnung berah Bryan Mbeumo leh Harry Maguire goal hmangin Liverpool chu an home-ah an hneh leh bawk.

Red Devils icon Peter Schmeichel chuan Harry Maguire chet dan chu a fak hle a, Maguire hi tun season khelh mekah hian a start tha vak lova, Premiere League bikah vawi 3 chiah starting line-up ah a lang a ni. United goalkeeper hui Schmeichel chuan Harry Maguire hian captain armband chu hreng leh se tih a duh hle a, Amorim hian leadership role thlak se tih chu a duhthusam a ni.

Schmeichel chuan Anfield-ah ti hian a sawi, "Ka fak tawp theilo. Maguire hian eng game pawh khel vek se tih hi ka duh a, captain ni turin ka duh bawk. Manchester United captain ni turin engkimah a tha vel vek a ni. Player rang tia sawi tur a ni lova, a inher muang bawk tih chu ka pawm thlap. Mahse, Man Utd hian hetiang defender hi a hma pawhin an lo nei tawh a ni. Man Utd defender tha ber a ni thei a, player dang te chu a huikhawm thiam anga, thu a hrilh thei bawk anga, inrintawkna a pe thei bawk ang. Hei hi a pawimawh ber niin ka hria" tiin ViaPlay a hrilh.

Peter Schmeichel chuan Man Utd captain ni mek Bruno Fernandes chungchang pawh a sawi tel: "Bruno Fernandes hi player tha tak a ni in ka hria, mahse, engemaw chang chuan position dik loah a khel thin in ka hre bawk. A body language hi ka duh lo hle. Player thenkhatte chu tawngkam tha takin a be ngei ang, mahse, engemaw chang chuan a reaction leh chet vel dan hi a tisual ve deuhin ka hria. Hei hi Maguire chuan a ti ve dawng lo a, mi dawhthei tak leh hahdam taka timi a ni. chuvang chuan Harry Maguire hi team captain atan ka duh a, player dang pawh a puih thei ngei ang. Harry Maguire a khelh avang leh goal a khung avangin ka hlim hle" tiin a sawi bawk