Champions League match Chelsea leh Ajax te inkhelhah Chelsea lam chuan record thar an siam a, first half thlen hma meuhin record thar an siam a ni.
Hriat angin Ajax lam hian red card an hmu hma ang reng a, minute 15 vel lekah Kenneth Taylor chuan red card a hmu a ni. Kha red card avang khan Ajax lam pawh an beisei angin an che thei bik lo.
Marc Guiu chuan Chelsea goal khatna khungin, a hnu lawkah Moises Caicedo'an rawn khung ve leh a ni. Manchester United striker hlui Wout Weghorst chuan penalty hmangin Ajax tana goal awmchhun a rawn khung ve bawk. Mahse, hemi hnu hian Chelsea lamin penalty vawi 2 hlawhchhuakin, Enzo Fernandez leh Estevao chuan goal rawn khung lehin 4-1 in hma an hruai.
Chelsea hian an club chhung bikah Champions League record thar an siam a, chu chu Chelsea history bikah club tana Champions League goal khung thei naupang ber ni turin kum 19-a upa Marc Guiu chuan minute 18 naah goal a rawn a khung a ni.
Amaherawhchu, minute 33 hnuah kum 18, thla 5 leh ni 28 a upa Estevao chuan goal rawn khung ve lehin Marc Guiu record neih chu a rawn khum nghal a, a tunah hian Chelsea history bikah an club tana Champions League goal khung thei naupang ber chu Estevao a ni.
Tyrique George chuan minute 48 naah Chelsea goal 5 na rawn khungin, tunah hian kum 19 a upa a ni ve bawk. Ti khan Chelsea history-ah teenager 3 ten European inelna match a goal an khung theihna hmasa ber a ni bawk
Chelsea hian player talent nei tha la naupang si an kawl nuk a, an hmalam hun chu a eng chiang a ni..
0 Comments