Manchester City boss Pep Guardiola chuan Chelsea an hneh tumin, defender Abdulkodir Khusanov chu a game hmasa ber ni turin a khelh tir a. Mahse, Uzbekistan international hian City tana a inlan hmasak bernaah duh ang leh beisei angin a che tha lem lo hle.
Man City hian Kum 20 a upa Khusanov hi Lens atangin Euro 40 million laiin an la lut a, Chelsea an hmachhawn tumin a game hmasa ber khel mahse, beisei a phak vak lova, Second half tan anih atanga minute 9 naah lak chhuah a ni. Game khelh zawh anih khan kum 20 a upa a start tir chhan zawh a ni a, a lak chhuah laia a biak loh chhan zawh a ni bawk.
Pep Guardiola chuan ti hian a sawi, "English tawng a hman loh avangin amah chu ka be lova, a tha zel mai ang. Vawi 1 emaw 2 vel chauh ala training a, ka start tir chhan chu hliam atanga rawn kir John Stones hi ka luh hmasak tir duh rih loh vang a ni." tin a sawi.
"Player te hi tangrual tur anni a, hei hi thil pawimawh tak a ni. Player zawng zawng te hian tihsual annei thei vek a, Manchester City fans te hian englai pawhin player thar te an support ziah thin. Ala naupang a, a inzir chho zel ang." tiin a sawi bawk.
"Atan thil awlsam a ni lo, vawikhat chiah ala training a, Nicolas Jackson, Cole Palmer, Madueke leh Sancho te a hmachhawn nghal a ni. Hei hi atan inzirna tha tak tur a ni." tin a ti bawk.
Man City leh Chelsea te inkhelah hian mual neitu City lamin 3-1 in hnehna an chang a ni.
0 Comments