Summer transfer lai khan Scott McTominay chuan Manchester United chhuahsanin Napoli a zawm anih kha, hemi chungchangah Man Utd boss Erik ten Hag a tawng chhuak.
Kan hriat angin McTominay hi Man United Youth Academy atanga graduate niin, summer transfer lai khan Napoli chuan £25.7 million in an la lut a, United nena an inzawmna chu a tawp ve ta a ni.
Tominay hian Italy lamah thawm a nei lian nghal hle a, Serie A game 5 a khelh tawh atangin Napoli tan goal 2 a khung mek a. Italian Media thenkhatte chuan nickname an phuahsak nghe nghe.
Brentford an hmachhawn tur pre-match press conference-ah Ten Hag chu McTominay chet that chungchang vel zawh a ni a, Ten Hag chuan a lawmpui thu sawiin, United a chhuahsan kha a duh bik lo niin a sawi bawk.
"Scott hi ka lawmpui hle, a chhuah laia ka lo sawi tawh angin, a chhuah hi ka duh bik lo, mahse, rules a ni tlat." tiin Ten Hag chuan zawhna a chhang.
"Club hian Financial Fair Play rules leh rules dang buaipui tur a nei hi a ropui lo hle. Heng rules te hi a tha lo tak zet. Mahse, rules hrang hrangin club hi a din miau bawk si, chuvang chuan loh theih lohvin he duhthlanna hi kan siam a ngai ta a ni." tiin a sawi bawk.
Goal atanga teh chuan McTominay hian season hmasa kha a hmang tha ang reng hle, inelna hrang hrang match 43 ah inlanin, goal 10 a khung tling ve a ni.
Mahse, Man United lam hian financial rules an zawm a ngaih avangin an midfielder hi an chan a ngai ta a, season hmasa lamah Brentford an hmachhawn tum khan McTominay chuan stoppage time ah goal 2 a khung a nih kha.
Ten Hag hian United chu duh ang leh beisei angin season bul a tan that pui lo hle a, league match 7 an khelh tawh atangin vawi 3 lai a tlawm pui tawh a ni. Brentford an hmachhawn turah hian hnehna chan ngei a mamawh hle.
0 Comments