Al-Nassr boss Jorge Jesus chuan game khelha Critiano Ronaldo a thlak ngailo chhan leh minute 90 a khelh tir ziah chhan a sawi. Kan hriat angin kum 40 a upa C Ronaldo hi Knights of Najd tan player pawimawh ber pakhat ala ni chhunzawm zel a, tunah hian a zawnin league match 7-ah hnehna an chang tawh a, table-ah pakhatna dinhmun hauhvin, point 3 in an sang fal mek.
Al-Hilal boss hlui Jesus chuan Al-Feiha 2-1 a an hneh hnu khan reporters te hnenah C Ronaldo a thlak ngailo chhan a sawi a, second half huntawp dawn tepah pawh ala thlak ngailo a ni. Mahse, a player hi chawlhtir hun a neih tur thu a sawi tel bawk.
"Cristiano Ronaldo hi player ropui tak a ni a, a taksa a hre chiang hle. Chawlh a mamawh hun leh chawlh a dil anih chuan ka chawlh tir mai ang. A bik takin Asian inelna lamah hian chawlhtir ka rilruk a, mahse match thenkhatah chuan ka chawlhtir vek thei lovang, Ronaldo hi camera in an la hmaih theilo a, a pawimawh hle. Engemaw chang chuan kan tawrh ve a ngai thin, mahse, a khelh zel theih hi kan tan a pawimawh tak zet." tiin Jesus chuan a sawi.
Cristiano Ronaldo hi tun season khelh mek league match bikah a khelh tawh chuan thlak ala ni mang lova, minute 90 a khelh chhuak deuh zel a ni. Tun season bikah minute 630 khelh tur awm atangin minute 629 lai a khel tling a ni. Amaherawhchu, AFC Champions League lamah erawh ala inlan lova, Jorge Jesus chuan Saudi Arabia atanga zin chhuak rihlo turin a vengthawng ve deuh niin a lang.
Tun season Saudi Pro League khelh mekah C Ronaldo hian goal 8 khung tawhin, penalty atangin goal 2 a khung bawk.
0 Comments