C Ronaldo'an Bruno Fernandes chu Man Utd lama la awm turin a hrilh

Bruno Fernandes chuan Man Utd lama a hmalam hun chungchangah C Ronaldo nena an inbiak dan a sawi chhuak.

Summer transfer window lai khan Man United thiampuipa Bruno Fernandes chu Old Trafford chhuahsan tum anga sawi a tam hle anih kha.

Kha tih lai khan Saudi Pro League club Al Hilal chuan Red Devils atanga lak chhuah a, Middle East lama lak luh an duh hle.

Mahse, Al Hilal lamin sum tamtak hmangin lak luh tum ve bawk mahse, Fernandes chuan offer tha tak tak te chu hnarin United-a la cham chhunzawm chu a thlang ta a ni.

Tun season khelh mekah hian United chu Ruben Amorim hnuaiah a changin an che tha a, a changin an che chhe leh thin a, mahse an game hnuhnung pahnihah erawh a zawnin Sunderland leh Liverpool chu an hneh a ni.

Man Utd chuan an game khelh leh turah Brighton and Hove Albion an hmachhawn dawn a, Fernandes chuan Summer transfer laia thil thlen dan a sawi chhuak.

Saudi Arabia lam atangin offer tha tak mai hmu mahsela, Fernandes chuan Portugal legend Crisationo Ronaldo chu a rawn a ni.

Bruno Fernandes chuan Ronaldo nena an inbiak chungchang Daily Mail a hrilh.

"Hemi chungchang hi Cristiano Ronaldo ka hrilh a, Cristiano Ronaldo chuan ngaihdan hran a nei ve a, chu chu ka zawm ngei ngei a ngai a, a ngaihdan te chu ka tana pawimawh tak tur a ni" tiin a sawi

Bruno Fernandes chuan an offee neih te a hnawl chungchang a sawi mai bakah, 2026 World Cup zawh hma chuan engmah thuthar a awm loh tur thu a sawi.

" An offer tha zet mai ka hnawl tak avang khan an lawm lo ang tih chu ka hria, mahse, ka pawm thlap. A chhan chu an offer kha engti hawi zawng pawhin a tha vek a, a hlawh ang zawng pawhin tha tak a ni. Engkim mai kha ka tan chuan a tha vel vek, a danglam tak zet" tiin a sawi belh.

"Mi tamtakin an offer chu accept tawh ang leh season thara lut tur anga min sawina pawh ka hmu nual. Club lamin inremna lo siam teh reng pawh nise, ka tih a tel rih lovang. Ka agent pawhin ka thil tih leh hnathawh dan a hre vek. A duh anih chuan min be thei reng a, mahse chu chu World Cup zawh hnu lam a ni ang. A chhan chu chumi hma chu engmah ka la sawi chhuak thei rihlo a ni" Tiin a sawi bawk.