Tottenham Hotspur striker Richarlison chuan social media lamah 2025 Ballon d'Or ranking chungchangah a lawm lohna a post.
Kan hriat angin nizan khan khawvel player tha zual thlanna chu Theatre du Chatelet, Paris, France-a neih a ni a, Ballon d'Or ceremony-ah hian player tha tak tak ten lawmman an dawng a ni.
Kum 2025 Ballon d'Or winner chu France leh Paris Saint Germain star Ousmane Dembele'an a dawng a, hmeichhe lamah Barcelona star Aitana Bonmati in a dawng ve bawk. Aitana Bonmati hi hmeichhe lam atanga a zawna Ballon d'Or vawi 3 dawng thei hmasa ber a ni nghe nghe.
Ballon d'Or Ranking-a pahnihna Lamine Yamal chuan Kopa Trophy a dawng a, hei hi player naupang che tha zual chawimawina a ni. Lamine Yamal hian Ballon d'Or ranking-ah Vitinha, Mohamed Salah leh Raphinha te chu a khum a, Raphinha hi pangana dinhmun hauhtu a ni.
Ballon d'Or lamin final ranking an puan hnu lawkah khan Spurs striker Richarlison chuan social media lamah a lawm loh thu a sawi.
An ram Brazil tan an lo khel dun tawh thin a, Richarlison chuan 2025 Ballon d'Or hi Raphinha hian a dawn ngei a ring a, mahse a dawng lo tlat. Raphinha hi Ballon d'Or dawng thei tur zingah a langsar lo hle a, ranking-ah 5 na dinhmun a hauh bawk.
Hetia dinhmun hniam zawka a din avang hian Richarlison pawh a hlim lo hle a, Instagram lamah Raphinha thlalak chu post in a lungawi lo thu a sawi chhuak a ni.
Brazilian hian sason hmasa khan match 57 a inlan atangin goal 34 a khung mai bakah assist vawi 25 a nei bawk.
Raphinha ranking chungchangah hian Richarlison chiah hi lawmlo a ni lova, fans tamtak an lawm lova, lawm lo zingah hian Neymar pawh a langsar hle.
Fan pakhat chuan ti hian an sawi, 'Raphinha hi Champions League lama player che tha ber pakhat a ni, he award hi a nuihzatthlak hle" tiin a sawi.
Fan pahnihna, "Raphinha hi an ruk sak a ni"
Fan pathumna, "Top 3-ah tal chuan awm a phu"
Fan Palina, "Raphinha hi a chet that teh reng nen, 5 na hauh maw a hauh, a fairlo tak zet" tiin social media lamah an lungawi lohna hmuhtur a tam hle.
0 Comments